Den e programa aki nos invitado ta Sr. John Rafael Hart. Ela nase 9 Juni 1930 na Brooklyn, New York i ta bibá na Aruba. E fam Hart ta indika ku e ta di desendensia Boneriano. Nos ta kombersa kune tokante su bida, spesialmente funkshonnan ku ela okupa na Aruba i tambe e Aruba di antes.
Produkshon: Fundashon Históriko Kultural Boneriano
Durashon: 54 minüt
Nòmber: John Rafael Hart
Fecha di nasementu: 09-06-1930, Brooklyn, New York
Fecha di grabashon:
Entrevistadó: F. D. (Bòi) Antoin
Okashon: Herensia di Siglo 20
John Hart ta bibá na Aruba. E fam Hart ta indiká ku e ta di desendensia Boneriano. Pregunta: Dikon John, un desendiente di Boneiru a nase na New York? John por konta algu di esaki? Kontesta: Mi mama ku mi tata a nase na Boneiru. Mi tata yama Juan Ricardo Hart i mimama yama Jacomina Daalling Hart.Nan a namorá otro na skol na Boneiru i nan a bai kasa na Brooklyn. Mi mama su fam tabata Daalling. E tempu aya hopi boneriano tabata bai Brooklyn. Mi mama tin dos ruman hòmber, Juancito i Olivieranto nan a paga pasashi pa nan i nan a bai Brooklyn. Nan a bai ku Baralt, e barku di KNSM. Pregunta: Ki trabou e tata di John tabatin na Brooklyn? Kontesta: El a nabegá hopi i a traha pa kòki. Despues el a traha den Zeemanclub na Brooklyn. Mi wela, mamadi mi tata, a skirbié un karta: “Mi yu, bin Boneiru. Boneiru ta mihó ku Merka. E kabes a susha i nan a bai Boneiru. Nan a bai biba Boneiru ku nos tur. Pregunta: Kuantu ruman Johnnan tabata ora ku nan a bin biba Boneiru? Kontesta: Nos tabata sinku ruman, kuater hòmber i un muhé. Nan yama Maria Martilia, Jenny, Olivia, Alexandrina i mi mes. Tin un rumanmas ku a nase na Boneiru, Carlos. Pregunta: John no ta kòrda masha kos di Brooklyn? Pregunta: Nò, mi no ta kòrda nada. Mi tabata chikitu, mi por a bai Boneiru ku 12 luna. Mi ruman muhénan sí a bai skol na Brooklyn. Ora ku nan a yega Boneiru nan tabata papia ingles, despues papiamentu, nan idioma.
Pregunta: John a yega di tende di mas famia ku a biba na Brooklyn? Kontesta: Mi omo, ruman di mi tata. E tin tres yu, dos muhé i un hòmber. Mi omo yama Federico Hart. Nanta yam’é Mo Fechi. Mi mama tin dos ruman hòmber ku yama Olivier i Juancito. Nan a keda biba semper na Merka, pero nan a muri kaba Pregunta John a yega di bishitá nan na Merka despues? Kontesta: Nò, mi n’ wòri mas. Mi ta un merikano ku pasport merikano. Mi tin pasport merikano i tambe pasport hulandes. Pregunta: Kon bini John a keda ku e pasport merikano? Tabatin un motibu spesial? Kontesta: Mi tin un ruman hòmber ku tabata biba na Puerto Rico. Carlosa kasa ku un Portorikeño i a bai biba na Brooklyn. Anto pa mi bai fakansi serka dje mi tabatin mester di un visa. Pero dor ku mi a nase na Merka mi no por a haña visa, mi por a haña síun pasport merikano. Esei a pone ku mi tin un pasport merikano. Esei ta bon paso mi yunan a krese i mi tin yumuhéku ta biba na Houston. Asina ta ku e pasport merikano a yuda hopi pa bai pasa fakansi serka nan. Pregunta: Ora John a bin Boneiru komo mucha, John a lanta na Boneiru? Kontesta: Si, mi a lanta na Boneiru,na Sabana, na kas di Da Booi, pegá ku skol. Nos a biba hopi den e kas ei serka mi mama ku mi tata. Mi mamanan no a biba muchu na Boneiru tampoko. Pregunta: Ora nan a yega Boneiru ki trabou John su tata a bai hasi? Kontesta: Mi tata a bai nabegá na Aruba i despues mi mama a bai buska trabou p’ e na Boneiru. El a bira ‘vuurtorenwacht’ na Playa Pariba, esun di Saliña, Willemstoren. Nos tabata keda drumi hopi serka dje einan, hopi skur. Nos tabata tende gritu anochi pero nos a drumi bai. Ora di dia habri hunga bo ta hunga tròm ku fli. Mi tata tabata kushiná bon pa nos kome, piská fresku. Pregunta: E so tabata warda toren einan òf e tabatin kompaño? Kontesta: E tabatin kompaño, Jonchi Martines. Un siman mi tata tabata keda i un siman e tabata keda. Pregunta: Ku kiko tabata bai na e toren, ku outo, ku pia, ku kabai òf buriku? Ta kon e transporte tabata?
Kontesta: Ora ta ofisial ta ku outo anto ora ta no ofisial ta ku pia.No ofisial ke men ku bo ta bai na pia. Nos famia tabata bai ku outo.Pregunta:Den dia nan no tabatin trabou pa hasi? Ta piska nan tabata piska? Kontesta: Mi tata tabata un hòmber kreativo. El a kohe e toren el a drech’é, el a fèrf e, traha piedra na banda i traha kaminda. E hòmber ei no tabata sinta ketu. Pa ami,Saliña tabata un parti históriko. Mi no por lubid’énunka. Pregunta: Mas pabou tabatin un produkshon di salu tambe. John ta kòrda ku hendenan tabata saka salu fo’i den e saliñanan? Kontesta: Sigur no, nan tabata saka salu fo’i den e bakinan. John Torbet tabata dirigí e trabounan den Saliña. Nan tabata paga e hendenan un sèn pa kada garoshi di salu. Un tempu nan tabata traha salu i otro tempu nan tabata tira e salu na boton. Anto e salu a keda einan. Tempu di mi tempu e barkunan no tabata bin buska salu einan.Nan tabata manda e sakunan di salu Playa ku trùk anto di Playa nan ta bai riba barkunan, manera Ruth, Melania. Mi ta kòrda ku tabatin un barku pretu, ingles, un brek. E tabatin bin kue hopi salu. E hendenan tabata traha pòrnada pasó e kapitalistanan tabata gana hopi plaka ayanan. Pregunta: E famia Hart di John, ta e famia Hart di Playa, ke men Joss Hart, Elisabeth Bachi, Booi? E famiaHart a meskla hopi ku e famia Booi na Boneiru? Kontesta: Nan a kasa ku nan. Joss Booi mes a kasa ku un Venezolano, Laura. Mi no ta kòrda su fam. Pregunta: E famia Hart aki ta un famia importante na Boneiru. Ora John ta papia di kapitalista, e hendenan ei tambe ta kapitalista òf nò? Kontesta: Boneiru tabatin dos kapitalista. Esundi Saliña anto e otro di barkunan. Esun di barkunan tabata mihó pará ku esun di Saliña. Esun di barkunan tabata Hart nan. Pregunta: Famia Hererra tambe tabatin hopi plantashi. Famia Hellmund tambe. Ora bo konta bon ta tres te kuater famia tabatin ku modana Boneiru. Famia Debrotnan mas promé, Shon Michael Boom. Ta nan tabata por bisadoño di Boneiru òf nò?Kontesta: Michael Boom tabata bende kabritu. Mi ta kòrda ku mama tabata traha p’e. Un pakus e tabatin, e tabata un hòmber kòrá, haltu asina. Hellmundnan tabatin pakus.Hartnan tabatin negoshi, mata kabritu tur siman. Pregunta: John, ora mi papia ku e hende grandinan ku a traha pa e famianan Hart i Hellmund, nan tabata bisa ku e hendenan ku tabata traha pa nan no tabata haña sèn den nan
man, nan tabatapaga nan ku bòn. Ta bèrdat? Kontesta: Si, mi a mira esei si, nan ta haña bòn i ta bai kumpra kos na e negoshi di e famianan ei mes. Ke men esun ku a duna bòn, a gana riba nan.L.D. Gerharts a kibra e asuntu di bòn, el a kibra tur kos. Gerhartsta un parti sosial di Boneiru. Mi a traha pa Gerharts. Dia mi tabata mucha m’a bai traha na Brakapùt. Despues ku mi mama i tata a muri, nos tabatin mester di sèn pa mi ku mi rumannan. El a dunami trabou den su ofisina. Mi tabata selektá tur papel di gobièrnu, vervoer, belasting, duana,tur kos.Mi tabata pone nan apart pa Medardo Thielman paga nan. Pregunta: Si John wak bèk, John por bisa ku Gerharts a hasi hopi kos pa Boneiru, bon kos? Kontesta :Si, bon kos. Hopi hende tabata kere ku Gerhartsa hasi kos ku su plaka. Nò, Gerharts a hasi loke e mester a hasi. Tabatin lei sosial, lei kolonial pero el a sali dilanti pa yuda hendenan di Boneiru. El a yuda nan di un manera òf otro. Niun hende no a hasi manera Gerharts a hasi. Pregunta:Nan a duna asta un kaya na Boneiru ku e nòmber di LD. Gerharts. John ta di akuerdo ku esei? Kontesta :Sigur no, Sabana mester a yama L.D. Gerharts pasobra Gerharts a hasi hopi pa Boneiru. Pregunta:John a bai skol na Boneiru, skol di frater e tempu ei? Kontesta :Si, Frater Francisco, Frater Martines. Tabatin mener tambe na skol. Shon Bubu Booi, Calito Nicolaasi Charles Beukenboom. Ta nan tres tabata e úniko maestronandi skol.Nan tabata dal bo, bo mester a habri bo man pa bo a wanta sla. Bo tabata haña dies sla den bo man. Anto bo no tabatin mag di yora durante e sla, despues si. Nan tabatastrèn, pero esun di mas strèn tabata mener Charles Beukenboom. Calito i Shon Bubu sí tabata pasífiko. Charles tabata duna muchanan ‘bijnaam’. Ami nan tabata yama mi Shosho. Pero nan a siña nos bonerianonan bon siñá. Mi ta agradesido na nan. E sùrnan tambe a siña e mucha muhénan bon i e fraternan a siña e mucha hòmbernan bon. Nan tabata strèn, pero tabatin un motibu. Awe loke ku mi ta wak den e islanan aki no ta e kos ku nos a laga.Loke ku mi ta wak den e islanan aki ta ku nan ta ‘please’ muchue muchanan. ‘Please’-mentu na Boneiru no tabatin.Mi tata ku mi mama tabata strèn tambe. I bo mester a bai traha pa kria bo mama, ‘period’. Si ta nabegá bo mester a nabegá òf ta riba barku di bela bo mester a bai, pero ta asina e bonerianonan a lanta. Nan tabata strèn pero e motibu tabata bon. E sistema di boneriano tabata bon. Pregunta: E bonerianonan ta pasífiko, nan ta bisa ku nan ta humilde, ku nan ta aseptá muchu hopi kos i ku e kos ei no ta bon.
John komo un hòmber ku tabata den sindikato ántes, ora bo ta humilde bo ta soportá muchu kos òf nò? Kontesta: Bo tin rason, humilde nan ta, pero nan ta stret si, nan ta ‘point’. Bo no por tuma un boneriano hasi sokete. Ke men e hendenan di ántes, mi no ta papia di awor, mi ta papia di ántes.Ora nos sa bai wak futbòl, ta wega di futbòl tin. Ora nan ta hinka gol, ta gol nan ta hinka, no ko’i loko. Pregunta: John mes tabata hunga bala tambe? Kontesta :Si, mi tabata kiper. Mi tabata hunga den e tim di Brakapùt. Despues di a kaba skol di fraterna Boneiru, mi a bai Brakapùt serka e ‘broeder’-nan. E ‘broeder’-nan ei sí no tabata strèn, nan no tabata dal. Nan tabata duna bo straf. Si bo no bai skol, bo no ta hunga bala.Nos tabata kome bonchi tur dia. Anto djabièrnè nan tabata duna nos piská, masbangu. Pregunta: Ken mas tabata huntu ku John, ku John ta kòrda,muchanan diBoneiru ku tabata naBrakapùt? Tabatin mas? Kontesta: Sigur no, diferente di mi amigunan a muri si. Mooi Marchena, tabata hunga bala bon. El a muri. Faito Migares, ta na bida ainda i ta biba na Kòrsou. E tabata bisti mashá bon mes ora ku e tabata bai frei, e tabata bai frei na flus.Anto ora e pasa dilanti di santana e ta kore, e tabatin miedu. Pregunta: John a biba na Brakapùt, anto kua skol John a bai? Kontesta: Si bo a biba na Brakapùt, bo ta bai skol i siña pa Bankwerker, pero debí ku mi famia tabatin mester di yudansa, nan a manda mi Boneiru. Kasá di mi tanta, Shon Papa, a manda mi Boneiru. Mi a bai Boneiru anto e ora ei Gerharts a yuda mi ku trabou. Despues mi a bai Aruba. Pregunta: Kon bini John a bai biba na Aruba? Kontesta: Mi ta kòrda kuat’or di a tardi mi a sali ku e barku Hudson, di famia Marchena, for di Boneiru. Pregunta: Dikon John ta bira hopi emoshonal ora John a bai fo’i Boneiru, John tabatin duele di bai for di Boneiru? Kontesta: Si, mi tabatin duele di a bai laga mi rumanmuhénan. Mi mama ku tata no tabata na bida mas. Pregunta: Kon Aruba tabata e tempu ei?
Kontesta: Na aña 43 mi a bai Aruba, tempu di segundo guera mundial.Aruba tabata un bon isla. Hopi hende a traha pa Lago. Tur atardi trùknan tabata bai bin ku hende pa traha. Ami a traha pa Jan Eusebio Croes, bende piesa di outo. Mi tabata kobra 25 florin pa siman. Pero despues e plaka no tabata yega. Bo tin ku paga bo kuminda i bo tin ku manda plaka Boneiru. Asina nos a lanta, mester kria famia. Boneiru tabata malu e tempu ei, no tabatin trabou. Aruba tabata yen di traboue tempu ei, aña 43. Aruba ta un isla bendishoná. Te ainda e ta bendishoná, Dios tin su man riba Aruba.Fo’i dia m’a pone pia aki riba kos ta bai bon pa mi, mi a haña trabou. P’esei m’a bai nabegá. Mi promé barku tabata Maracay. Esei tabata despues di guera. Pregunta: John no a pasa den e tragedianan di guera? Kontesta: Nò, na Boneiru si. Un partidi nos a keda sin bai skol pasó e Alemannan tabatin mester di e skol pa nan a bai den dje.Despues di guera mia bai nabegá pa Lago na Aruba riba e barku Maracay, un tènker. Esei tabata e promé barku, despues m’a bai nabegá pa Livingston Roe, un ‘ocean tanker’. Pregunta: Kiko ta e diferensia entre un ‘ocean tanker’ i un ‘lake tanker’? Kontesta: Un ‘lake tanker’ tabata bai Maracaibo so pa kue petrolio pa nan a refiná. Un ‘ocean tanker’ nò, e ta kue ‘fuel’ pa bai kuné na diferente porta.E Livingston Roe ei,ami tabata gustae barku eipasobra ta Havana ku Cuba so e tabata bai. M’a keda hopi tempu ku e barku ei. Un aña i piku sin bai Aruba, pero e tabata laga bo na wèrki tambe. Bo tabata gasta tur bo sèn i esei no tabata e intenshontampoko. Despues e barku a bin Aruba anto e problema di bandera panameño a pone ku nan a baha nos tur for di e barku i e hendenan di Panamá a subi e barku.Ami, suèltu a yuda mi i m’a haña un barku ku yama Misoa. E mesun dia ku nos a sali ku e barku nos a bai drei dòk na Jacksonville na Florida. Nos a keda tres pa kuater siman drei dòk, despues nos a bin Aruba bèk. Na Lago si bo tin dos luna di fakansi bo tin ku tum’é. Ami tabatin tres luna di fakansi, mi a tum’é i a bai Boneiru. M’a bai Boneiru na aña 50 i m’a namorá di Ana yòn-yòn-yòn. Na aña 53 nos a kasa. Pregunta: Kon John a topa ku Ana, ta ken a gusta otro promé?Kontesta: Na su tanta nos a topa, komo ku mi sa bai kas di su tanta, Shon Mona ku Olivia su prima anto ei mi a namorádi dje. E kos no a bai fásil. El a bai duru. Promé ku mi a pensa pa kasa, m’a haña un karta ku el a dank mi. Tur kos a kaba. Pregunta: Ana, kon bin Ana a dank John na promé instante?Kontesta: Na promé instante nos a gusta otro, pero despues nan tabata bisa mi ku e hòmber aki tabata bebe, barku tabata bai lag’é. E ora ei m’a bisa: “Papa, mi no ta sigui ku e mucha hòmber aki mas, pasó e no ta stret. Papa a bisa: “Nò mi yu, t’asina tur
hòmber ta. Despues nos a keda skirbi otro pero despues mi di laga e kos aki kaba asina. Despues mi a bai biba Aruba ku 18 aña anto despues di un aña nos a sera ku otro atrobe. Pregunta: Ta bèrdat ku John tabata gusta dal beter te ku barku tabata bai laga John? Kontesta: Nò nò, ta redashi e kosnan ei tabata. Hendenan tabata traha kos. Boneriano no, gusta redashi. Mi tabata dal mi beternan si, mi tabata gusta serbes Heineken. Pregunta: Kon ku bai bin boso a kasa, na Aruba mes? Kontesta: Si, nos a kasa na Aruba mes. Despues mino a nabegá mas, pasó e barkunan a kaba. Nan a mara e barkunan anto m’a bai traha na tera. Mi tabata traha den Lago Hòspital pa shete aña komo kòki. M’a traha den ‘food and beverage’. Mi tabata yuda nan ku salada ku e kosnan ei. Despues sindikato a bin aden. nan a forma Petroleum Federation of Aruba. Jose Hernadezdi Hòspital a puntra mi si mi ke a bira miembro di Petroleum Federation.Mi tatalo a bisa mi: “mi yu, union ta bon. Union ta hasi forsa”. Pero aki na Aruba union no tabata bon. Nan ta bringa union ketu bai. Mi a djòin Petroleum Federation of Aruba. M’a bira ……………….. Nan a elegí mi den bestür. M’a bira sekretario general. Hopi seminario m’a bai. Pregunta: Ke men e tempu ei ketu bai trahando pa Lago. Kon e situashon i kondishon di trahadónan di Lago tabata? Kon Lago tabata trata su trahadónan? Kontesta: Si, ketu bai trahando pa Lago. E tempu aya e pago no tabata bon. Pero danki Dios pa Federashon e pago a bin drecha masoménos. Pregunta: Elio Pellegrim tambe tabata den bònt, e tabata den Ayoha. E tabata konta ku ta nan sindikato a logra baha kantidat di ora di trabou di trahadónan di Lago di 48 ora pa 40 ora. Ta korekto? Kontesta: Esei ta korekto, pero mi ta bisa danki na nos Federashon, pasobra nos tabata den kompetensia ku nan. Nos tabata den korant tur ora bai. Pregunta: Dikon nan tabata bringa otro, dos sindikato ku tabata defendé e mesun trahadónan di Lago? Dikon nantabata asina tantu kontra otro? Kontesta: Esei ta Ellisy, e tabata un sindikato ‘blind’. E tabata masoménos un sindikato riba papel. Nan tabata mas nabanda di e doño di trabou ku nan banda di e trahadónan mes. Despues nan a drecha si, nan a bin pafó, na televishon i nan a pone nan ofisina. Ajoha a bira un bònt. Nos a kore referèndem kontra dje, nos a pèrdè referèndem, e ora eimi a ‘give up’. Mi di awèl nos a pèrdè referèndem, boso bai kaminda mayoria ta. Nan a tuma mi mashá na malu.Mi tabata buska trabou na gobièrnu i a haña trabou na Huis van Bewaring. Huis van Bewaring tabata un prizon ku mi n’ ta konosé. Pa mi haña ‘interview’ ku defunto Leo Maduro, mi mester a hasi
masha kos pa mi a yega Huis van Bewaring. Mi no tabata konosé e lugá mes. E tempu aya mi tabata konosé e ministernanJonchi, Kroon i Jockheernan bon. M’a bai serka Isa, minister di hustisia, i a puntr’é si e tabatin un trabou pa mi na Huis van Bewaring, wardadó di prezu. E ora ei m’a haña e trabou di wardadó di prezu ei i mi a tum’é. E tabata un benefisio, pasobra e trabou no tabata fásil.Huis van Bewaring tabata situá e tempu ei na Dokota. Pregunta: Tabatin hopi kriminal pisá na Aruba e tempu ei? Kontesta: Nò. Aruba no tabata konosé kriminalidat. Masha poko un hende bai será pa un krímen. No tabatin ni atrako ni asesinato manera tin awendia. Despues tur kos a bira moderno, a bin hotèl. Nan a bin buska mi pa nos lanta hotèl Hogesunion.Komo ku mi tabatin eksperensia den sindikato, Antonio Janga, un boneriano, a bin buska mi. Pregunta: Kon bin tin tantu boneriano asina den sindikalismo na Aruba? Bo ta haña Chinto Diaz, Elio, Antonio Janga, John Hart. Kon bin bonerianonan tabata asina aktivo den sindikato? Kontesta: En prinsipio na kas nan tabata tende di sindikato anto nan tata ku nan mama tabata bisa nan pa drenta union pa nan haña forsa. Asina tabata na Boneiru, Aki na Aruba ta otro. Pregunta: Ke men Hotel Hogesunion John Hart a yuda pa lant’é? Kontesta: Mi a yuda pa lant’é via CAO ku Hotèl Caribe, Sheritan, American Hotel, Concord Hotel, Manchebo Beach, Strand Hotel. Pregunta: John a bira presedente di sindikato? Kontesta: Si, m’a bira presidente.E tempu ei tabatin masha poko wèlga. Pregunta: Tabatin hopi inhustisia den sektor di hotèl? Kontesta: Nan sa bisa no mata galiña ku pone webu di oro. Anto bo n’ ta kore ku e hotèlnan pero bo tabata mira bon kiko bo tabata hasi. Aki na Aruba tin hopi sindikalista pero nan mester ‘watch out’ pa e webu di oro ei no bai pèrdí. Dia ku e webu di oro ei bai pèrdí nos tin problema serio. Pero mi ta respetá e sindikatonan ku tin na Aruba aki. Nan ta bai bon. Pregunta: John a yega den un posishon hopi haltu na prizon?
Kontesta: Si, nos a bai lès na Huis van Bewaring pa nos siña ‘bewaker eerste klas’, officier eerste klas.Mi a pasa èksamen serka Weis de Haseth. Weis tabata gezaghèber un tempu na Boneiru.Komo officier eerste klas nana manda mi bai traha na Kòrsou. M’a traha 3 luna na Kòrsou. Kòrsou sí tabatin hopi kriminal pisá. Despues mi a bai Aruba bèk. Ora ku nos hefe a bai i bira opzichter eerste klas, mi tabata mayor kaba i nan a puntra mi si mi ke a bira hefe di henter e prizon. Mi a tuma e responsabilidat grandi ei i a keda 10 aña hefe. Despues ku mi a bai kupenshunainda nan no por a haña un hefe ku e …………den prizon. Prizon ta un lugá ku e maneho no ta brutalidat. Ku trankilidat i ‘comon sense’ bo ta yega. Ami ta e promé hefe ku a pone kultura den prizon. Na fin di aña prezunan ta hunga komedia, nanta ‘have a good time’. M’a sòru pa duna e prezunan un trato humano. Pregunta: Tin hende ta bisa ku mester trata e prezunan malu pasó si bo trata nan malu nan mester sinti pa loke nan a hasi. John no tabata pensa asina? John tabata mas sosial? Kontesta: Mi tabata pensa ku hues a kastigá nan. Ami no tin ku kastigá nan mas, mi tin ku sòru pa nan. Mi ta kontentu ku hopi di mi kompañeronan a haña un bon ………………..Rovello ta mayor den prizon, ta hòmbernan ku mi a trein. E ta un bon mayor, pero nan mester hasi nan direktor. Pregunta: John ta kòrda hopi riba Boneiru ainda? Kontesta: De bes en kuando mi ta kòrda riba Boneiru. Boneiru no ta di nos mas, di Hulanda. Mi ta pensa ku esei ta un mal desishon pa kita nos isla fo’i nos. Un boneriano no por bati riba su pechui bisa ku e ta boneriano. Un boneriano no por bai Boneiru mas.
