PROGRAMANAN ‘HERENSIA’ VISIBEL RIBA INTERNÈT

E siman aki lo lansa BONAIRE.TV ofisialmente

PROGRAMANAN ‘HERENSIA’ VISIBEL RIBA INTERNÈT

KRALENDIJK — E trámitenan ta asina leu ku otro siman lo bai lansa ofisialmente e wèpsait www.bonaire.tv, un donashon di Ryan Oduber na Fundashon Históriko Kultural Boneriano (FuHiKuBo), hasiendo asina posibel pa e fundashon aki aloká su dokumentalnan históriko-kultural i e seri di programa Herensia riba Internet. Tur hende rònt mundu e ora ei por mira e produkshonnan aki grátis.

Aña pasá Ryan Oduber di Aruba a disidí di opsekiá e wèpsait aki ku e mes a krea na FuHiKuBo. E último simannan a hasi prueba kaba ku e wèpsait, riba kua mientrastantu tin e kuater dokumentalnan di bario ku FuHiKuBo a produsí, ademas un sierto kantidat inisial di programa ‘Herensia’. Ta e intenshon pa tur siman sigui pone mas programa ‘Herensia’ riba www.bonaire.tv.

FuHiKuBo tin ya kaba alrededor di 15 aña di eksistensia. A lanta e fundashon aki pa manehá un archivo, ademas publiká buki, traha programanan di radio i televishon, ku e meta prinsipal pa plama informashon di historia i kultura, tambe naturalesa, di Boneiru. E archivo t’ei, miéntras ku FuHiKuBo tin e programa di radio BEKU i e programa di televishon Herensia, ku a kuminsá pasa na luna di aprel 2000 na televishon. Ademas FuHiKuBo ta organisá kursonan di historia.

Ryan Oduber mes tambe lo ta na Boneiru e siman benidero pa papia di su proyekto mas grandi, esta pa banda di e wèpsait aki bai eksponé kultura i historia di Boneiru riba un plano mas haltu via Internèt, produsiendo programa i dokumentalnan históriko-kultural i di naturalesa boneriano, spesialmente pa potensial turistanan.

Ku lansamentu di www.bonaire.tv lo bira posibel pa hendenan ku ta studia historia i kultura di Boneiru haña akseso na informashon importante di historia oral. Studiantenan por hasi uso di e programanan aki den nan estudionan di historia di Boneiru. Famia di e personanan entrevistá den Herensia por mira nan hendenan bèk riba pantaya di nan kòmpiuter na kas. Na e momentu aki tin kasi 700 produkshon di Herensia.

 

Esena for di un dje kasi 700 programanan Herensia, ku kada un práktikamente ta un dokumental riba nan mes. Aki por mira Charles Janga, un dje fuentenan importante durante e kasi 13 aña di eksistensia.
Esena for di un dje kasi 700 programanan Herensia, ku kada un práktikamente ta un dokumental riba nan mes. Aki por mira Charles Janga, un dje fuentenan importante durante e kasi 13 aña di eksistensia.