E aña akí Nationale ombudsman, Reinier van Zutphen, mes ta bini Bonaire pa papia ku pueblo i ku diferente organisashon. Algun representante di e ombudsman lo kompañ’é. Meskos ku e añanan anterior nan lo ta dispuesto pa risibí keho kontra organisashonnan gubernamental. Entre otro siman djaluna dia 11 di aprel i djabièrnè dia 15 di aprel e representantenan lo bolbe tene diferente ora di konsulta na Bonaire. Ken ku tin keho kontra funshonamentu di gobièrnu òf kualke instansha di gobièrnu por akudí serka Nationale ombudsman. E representantenan Yvonne Kraan, Marlies van der Niet i Hans Oosterveer lo pone okashon pa konsulta diferente kaminda i diferente ora na Bonaire. No ta kosta nada pa enbolbé Nationale ombudsman. Aña pasá e oranan di konsulta tabata hopi bon bishitá. E representantenan a risibí un kantidat di 47 keho. E instansha kontra kua tabatin mas keho, esta 15, tabata Openbaar Lichaam Bonaire. Kontra polis tambe tabatin mas keho ku e añanan anterior, esta 9 total. Nationale ombudsman ta investigá si gobièrnu ta komportá manera debe ser. Ombudsman ta mira si instanshanan di gobernashon ta trata di un forma habrí i kla, ku rèspèt, enbolbimentu, dirigí riba solushon i konfiabel. Resientemente ombudsman a publiká un rapòrt tokante reakshon sin tardansa riba komunikashon di parti di siudadano. Ei den ombudsman a hasi algun rekomendashon ku otro siman e ta bai reuní riba nan ku konseho insular. Nationale ombudsman ta haña ku ta importante pa tin bon komunikashon entre gobièrnu i siudadano. Konsulta na Bonaire: • Antriol, Plasa Francisco Chiku Goeloe Djamars dia 12 di aprel, 09:30 – 12:00 Djaweps dia 14 di aprel, 09:30 – 12:00 Djaweps dia 14 di aprel, 18:00 – 20:00 • Rincon, Sentro di Bario Djarason dia 13 di aprel, 09:30 – 12:00 • Playa Kaya Industria 15a (dilanti di pòmp di gasolin Bonaco) Djamars dia 12 di aprel, 18:00 – 20:00 No tin mester di traha sita pa e oranan di konsulta. Pa hasi pregunta por yama 5216573 (alkansabel di 11 te 15 di aprel so). E aña akí ta posibel pa papia ku Nationale ombudsman mes. Reinier van Zutphen lo ta na Antriol, Plasa Francisco Chiku Goeloe riba djarason dia 13 di aprel di 17:00 te 19:00. Pasa, bo konta loke a pasa bo. Pa mas informashon, mira riba www.nationaleombudsman.nl/cn òf nos página di Facebook: Nationale ombudsman Caribisch Nederland.